La sivdad de Espanya ke simboliza mas los alkanses logrados por los djudios de este paiz antes de la Ekspulsion, es seguramente Toledo, la sivdad onde los djudios gozaron de un estatuto sin komparasion kon otras komunidades djudias de Evropa. A lo largo de los anyos en los kualos la sivdad, de mizmo ke una grande parte de Espanya eran dominadas por los arabos, i mizmo despues de sus rekonkista por los espanyoles, los djudios de Toledo okuparon algunos de los postos mas importantes en la administrasion, la ekonomia i la kultura del Reynado de Castilla.
Djuntos ken esto, en Toledo mizmo, el lugar ke reflekta este estatuto mijor ke todo es la sinagoga del Transito, nombre kon el kual es konosida agora la sinagoga de Samuel ‘Halevi Abulafia, fraguada en el siglo 14, por inisiativa i finansamiento del ken fue konsejero i trezorero del Rey Pedro I.
Fraguada entre los anyos 1355-1357, grasias al apoyo del Rey Don Pedro, ke inyoro las instruksiones del Papa defendiendo la konstruskion de muevos templos djudios, la sinagoga del Transito es una de las mas ermozas i importantes muestras del arte ispano-djudio, kon elementos mudejares (ispano-arabos), ermozos motivos florales i jeometrikos ansi ke inskripsiones en ebreo.
La Sinagoga del Transito, vista de afuera
Dezgrasiadamente, la konstruksion de esta manyifika sinagoga marko tambien una sima, despues de la kuala la situasion de las komunidades djudias de Castilla, i del resto tambien de Espanya, fue empeorando kada anyo mas. Don Samuel ‘Halevi, el mizmo, eskayo de su alta pozision, fue arestado, akuzado de aver konspirado kontra el rey i murio despues de aver sido duramente torturado. Poko despues el rey Don Pedro tambien pedrio su trono, en la gerra kontra su ermanastro Enrique de Trastamara ke yegando al trono tomo mizuras muy duras kontra los djudios de Toledo ke avian apoyado a su enimigo.
Aun ke la komunidad kontinuo a existir, sus dias, de mizmo ke los de las otras komunidades djudias de Espanya, ya eran kontados. La ola de mantansas i persekusiones ke esbrocho en Sevilla, en 1391 i se espandio a toda Espanya, afekto a la komunidad de Toledo tambien. A esto se adjustaron las persekusiones de la Inkizision en la segunda metad del siglo 15 i en fin, en 1492, la ekspulsion metio fin a uno de los kapitulos mas gloriozos de la istoria djudia en la Diaspora.
En kuanto a la sinagoga del Transito, eya fue dada por el rey Fernando i la reyna Isabela al orden relijozo de Calatrava. Dos anyos despues eya fue transformada en un lugar de orasion kon el nombre de Iglezia de San Benito. Desdel siglo 17 i endelantre el lugar fue konosido komo “Hermita del Transito”, nombre ke le vino de una ovra del famozo pintor Correa, “Nuestra Señora del Transito”, ke se topava sovre el altar.
Kon el tiempo el lugar kumplio otras tareas, algunas de las kualas no tenian nada ke ver kon la relijion: en el siglo 18 uvo ayi un monasterio, ma en la primera parte del siglo 19, en la gerra kontra la Fransia de Napoleon, el lugar sirvio de kazerna para soldados i despues de la viktoria torno a ser monasterio. El 1877 fue deklarado monumento nasional i mas tadre, en 1964, fue kreado ayi un Muzeo Sefaradi, ke en 1970 paso basho el kontrolo del Ministerio de Edukasion i Kultura kon el nombre de Muzeo Nasional de Arte Djudeo-espanyol, muzeo ke es oy dia uno de los prinsipales puntos de atraksion para los turistas en jeneral, i los sefaradis mas partikularmente, ke vijitan en Espanya.
La sinagoga del Transito es una sala rektangular de 23 metros de largura, 12 de anchura i 9 metros i medio de altura. Aun ke, vista de afuera, su aparensia es muy simple, su interior puede servir de exemplo a la manyifika arkitektura mudejar, kon las paredes kuviertas de azulejos, (kuadrados de seramika de diversas kolores i motivos) i ornamentos de stuko en forma de arabeskas kon motivos jeometrikos i florales de munchas kolores. En la parte superior de las paredes, ay tambien inskripsiones kon letras ebreas, de versikolos de los Salmos, i alavasiones al rey Pedro I, a Samuel ‘Halevi Abulafia i al arkitekto de la sinagoga, Meir Abadiel.
El manyifiko estilo de la sinagoga del Transito ansi ke de otros monumentos djudios medievales de Espanya, fueron el manadero de inspirasion para numerozas sinagogas fraguadas en Evropa en el siglo 19. La ermozura i la rika ornamentasion de las sinagogas espanyolas fueron konsideradas por las komunidades djudias en Evropa del siglo 19 komo un sinyo del alto nivel sosial i kultural de los djudios de Espanya, al kual aspiravan eyas tambien de yegar, un dia.