Una vez Djohá se fue al restorante. En la puerta del restorante estava eskrito:
“Kada uno paga sigún el dinero ke tiene”
Kuando eskapó de komer se alevantó i se dirijó a la puerta de salida.
Le disho el patrón del restorante: “Ey! Paga por lo ke komites! I komites muy muncho!”
Djohá kitó una moneda de una lira ke tinía en la aldukera i la dio al patrón del restorante.
Le disho el patrón del restorante: “Kualo es esto?! La komida ke komites kosta muncho mas de esto!”
Le respondió Djohá: “Enriva de la puerta está eskrito: Kada uno paga sigún el dinero ke tiene, i éste es el dinero ke tengo yo!”
Kontado por ISHAY AHARON COHEN – 2004
Notado i redaktado por MATILDA KOEN-SARANO