Despues de munchos anyos de storias i de rekordos esto eskriviendo la storia de mi vida.
Nasi en 1938. en la sivdad de Novipazar en Yugoslavia (oy Serbia), en una rejion ke era la mas parte musulmana. Muestra famiya djudia era una famiya grande kon ermanos, kunyados, tios, nonos i nonas. Mi padre, Isaak Papo, tenia ocho ermanos i ermanas. Serka de un anyo despues de su kazamiento kon mi madre, Renée de famiya Behar, pasaron a bivir en la sivdad Raska.
En el anyo 1941 kon la entrada de la armada almana mos ovligaron a ir kon la estreya amaria i tuvimos ke fuyir i eskondermos todo el tiempo. Mi padre kedo eskondido i no avrio la botika porke los almanes mos estavan bushkando todo el tiempo. Uno vino de noche a muestra kaza, kon un karro travado por bueyes i mos fuyimos (mi padre, mi madre, mi ermana la chika i yo), a la sivdad Josanicka Banja. Aya mos eskondieron en la kaza del papaz, ma apenas arivimos mos anunsiaron ke los almanes estan detras de mozotros. El ombre ke mos trusho a la kaza del papaz tomo a mi padre i se fuyeron a la foresta a una rejion de montanyas altas. De ayi fueron al kazal Yelakce i mi padre se eskondio en la kaza de uno de los abitantes. Tres dias despues mi mama, mi ermanika i yo tambien mos djuntimos a el i bivimos ayi unos 6-9 mezes.
Todo el tiempo ke estuvimos en este kazal solo el patron de la kaza, Simo, supo ken eramos. Yo no me akodro de el ni de su famiya, ma sigun me kontaron mis djenitores, el mos guadro i se preokupo de todo lo ke mos mankava en akel tiempo.
Unos mezes mas tadre, para muestra seguridad, mos yevaron a las montanyas a un otro kazal, Drence, a la famiya de Milo Bugishevich. Este ombre savia de ande eramos i kualo era muestra relijion. Mos eskondimos en una kabana en el kortijo. El se desidio ke no emporta lo ke afitara el mos guadrara a mozotros i spesialmente a mi padre. En la kaza no savian nada serka de un anyo, asta ke la mujer insistio a saver i el le disho. Eya kon el guadraron este sekreto.
En Drence estuvimos kaji tres anyos. Mi ermana i yo mos asentavamos en las eskaleras, mi mama ayudava a las mujeres en diferentes lavoros i les kuzia vistidos i fostanes, i mi padre se iva kon los ombres a lavorar en los kampos.
Ansi pasaron los anyos i grasias a estas buenas personas i un poko de mazal kedimos bivos Al kavo de 1944 la armada rusa libero a Yugoslavia i mozotros tornimos a Raska de onde mos aviyamos fuyido en la primera vez.
Topimos en la sivdad todo derrokado. inkluzo muestra kaza i la botika de mi padre. Mi padre reparo todo i avrio la botika de muevo. Mas o menos tornimos a la vida normal.
En 1949 mis djenitores desidieron de emigrar a Israel. Arivimos en Djulio de 1949 al kampo de olim de Gelilot i de ayi mi padre kon otros olim de Yugoslavia fondaron el moshav Kidron. Desde ke arivimos a Israel i durante munchos anyos, mi padre i madre estuvieron en kontakto kerensiozo, por telefon i por letras, kon las dos famiyas ke mos salvaron i los vijitaron tambien en Serbia unas kuantas vezes, la vez de alkavo en 1983. Pasaron los anyos, mi djenitores i los salvadores de Serbia murieron.
Alora deke vos esto kontando todo esto?
Antes unos kuantos mezes, una konosida muestra meldo un anunsio en una gazeta, de la union de olim de Yugoslavia, i eya mos telefono imediatamente.
En la gazeta estava eskrito “Estamos bushkando una famiya de alkunya Papo, el padre Isaak i la madre Renée, ijas Rachel i Lea i ijo Asher, ke nasio despues de la gerra”. Esta deskripsion era tan exakta ke mos emosiono asta lagrimas. La ke eskrivio el anunsio en la gazeta, era la inieta del ke mos salvo i mos eskondio en el kazal Drence. En el anunsio avia numeros de telefon suyo i de su padre, i la demanda ke les telefonemos, lo ke izimos naturalmente.
En el otro lado de la linya uvo una emosion muy grande. Malgrado ke era muy difisil para mozotros de avlar en serbo, avlimos i yorimos de las dos partes de la linya. Despues de unos kuantos dias mos desidimos, yo kon mi ermana de salir a viaje, no saviendo lo ke mos aspera.
Arivimos a la sivdad ande bivia la ija. Eya estava asperandomos komo se aspera al Mashiah, diziendomos “Agora tornatesh a kaza, esta es vuestra kaza”. La alegria del enkontro se mesklo kon munchas lagrimas, abrasos i bezos, komo ke enkontraron a alguno pedrido. Estava muy emosionada i eya anunsio a todos “ya vinieron”. Mos resivieron en la famiya de manera muy spesial, kon pransos ande las ermanas i paseo en la sivdad.
Naturalmente, en uno de los dias desidimos de ir al kazal, a la kaza de su padre (el ijo del ken mos salvo), ke agora tiene 80 anyos. Kuando mos vido se alegro muncho, mos abraso i mos bezo i se akodro de mi nombre i del de mi ermana.
Este ombre kazalino, lavorador de la tierra, tenia guadradas todas las letras ke mi padre le embio durante los anyos. El kito imediatamente todas las letras i las fotos para amostrarmos.
Despues de tres dias emosionantes, salimos a kamino a Raska, onde bivimos asta el anyo 1941. Eyos mos akompanyaron una parte del kamino, asta Josaninca Banja, de onde aviamos empesado a fuyir i a eskondermos. La separasion fue muy dura, kon bezos i abrasos.
Arivimos a Raska onde, en la stasion de otobus, mos estavan asperando tres ombres deskonosidos, ma eyos mos konosieron i empesaron a abrasarmos i a bezarmos. Dos de eyos savian mi nombre i el de mi ermana i mos kontaron ke estudyimos djuntos i ke eramos vizinos. Mos resivieron muy bien, kon pranso, tratamientos i storias del tiempo pasado. Les demandimos si mos pueden yevarmos a ver ande biviamos, i ande era el magazen de muesto padre.
Kaminaron kon mozotros en un dia luviozo, mos amostraron ande era muestra kaza i agora no avia aya nada. Entonses arivimos a un magazen grande i muy ermozo ke era un tiempo el magazen de muestro padre, siguramente ke mos emosionimos muncho. A un ombre ke estava a la entrada del magazen le disheron ke este magazen era muestro. Su repuesta fue sorprendiente. Se alegro muncho i mos invito a tomar kafe, i kuando vino la ora de separarmos, el mos disho ke si le diran ke tiene ke dar atras bienes, esta pronto a azerlo.
De aya mos fuimos a Novipazar, una sivdad ke el 90% de la populasion son musulmanos, i onde sigun los dokumentos ke teniamos, muestra famiya tenia ayi munchos bienes. Enkontrimos un ombre ke se paseo kon mozotros por toda la sivdad i mos amostro todos los bienes ke teniamos, entre otras, muestra kaza i muesto magazen.
Toda esta storia la kontimos a los ke arekojen testimonios en Yad vaShem, para investigar i saver a ken reviene de ser rekonosido komo “djusto de las nasiones”.
Unos mezes mas tadre resivi un anunsio de Yad vaShem de embiar a muestros amigos de Serbia “ojas de testimonio” orijinales. Se las embiimos i kuando las resivimos atras las dimos a Yad vaShem. Despues de kontrolar todos los detalios resivimos un anunsio muy alegre i pozitivo: Si, ay un rekonosimiento.
Resivimos un anunsio ofisial de Yad vaShem (tambien los salvadores de Serbia) ke desidieron otorgarles un sertifikado de agradesimiento i la medalya de “Djustos de las Nasiones”. Muestra alegria no tenia limito. Por fin puedemos rekonoser i agradeser. La seremonia de entregamiento de las medalyas i sertifikados fue en Mayo del 2010, en el Kal Grande de Belgrad.
Naturalmente estuvimos ayi mi ermana i yo, los unikos reskapados, kon toda la famiya de muestros salvadores. El enkontro fue kon alegria i muncha kerensia. La seremonia era impresionante i kon muncha dinyita, organizada kon buen gusto por la komunita djudia de Belgrad.
Antes unos kuantos mezes publikaron un livro ke fue eskrito por tres jurnalistas, i en el storias de famiyas reskapadas i sus salvadores. La seremonia de la aparision del livro fue en Tel-Aviv i seguro ke estuvimos aya.
Kreo ke aki se kumple la storia de mi famiya. Es bueno de akodrar, kontar i eskrivir afin ke kede para las futuras jenerasiones.
