Kon la primavera por la ventana, los arvoles en boda, flores ke kon ke orgulyo prodigan sus perfumes, la vida ke se renovela kon miles de tonos del vedre i las frutas ke empesan a avrir sus ojos a los rayos del sol i a la dulse tievdor del tiempo de los mirakulos….  PESAH es un enkanto !   La kanserya de las mujeres ke alimpyan sin keder sus kantonikos, azyendo briyar lo mas viejo, lo mas uzado en kaza, kuando se da attension al mas chiko detalyo mizmo, no olvidando de kitar de las maletas i de los bogos el ashuar, para ermozeyar kada lugar del nido familial..  La boda de la kozina tambien ande se van a aparejar las komidas tradisyonales ke todos asperan kon savores en la boka !   Se kozinaran el prasifuchi, kon la prasa, el kalavasucho, kon las kalavasas, la anchusa kon la spinaka i el almodrote, kon las berendjenas al orno, mesklando estos kon munchos guevos, arina de matsa, azeyte de oliva i punyados de kezo kashkaval !  Se aprontaran los bimuelos kon masa majada i guevos, se friyeran i se komeran dospues de envolverlos en el polvo de asukar o kualker otro dulse….

Se tendra ke aparejar el plato de PESAH kon el korban Pesah, el guevo, el karpas, el haroset, la lechua i todo le ke mos indika muestras kostumbres.  I lo mas importante sera el gateau de PESAH kon muncha muez, munchos guevos battidos kon asukar, arina de matsa, naranja, vino i un poko de kanela…. Yo me namoro por este gateau i el “Tezpishti”  tambien kon muezes i almendras muy paresido al gateau en mas seko i ke se le vazya asukar atada ensima.

 

El gateau de Pesah                                   el tezpishti

Pesah es la libertad, lo mas presyozo en la vida dospues de la salud.  Pesah es la fe en Di-o kon los ojos attados, muestra konfiyensa en EL, estando seguros ke entregandomos a EL, nada de negro mos puede alkansar i todo sera por muestro bien, si no en esta vida, en la Eternitad !  Muestra fe mos prokura el repozo, la kerensya, la pasensya i el bien-estar ke son nesesaryos para bivir.

Pesah es limpyeza, la fiesta de la kaza ke briya por las manos bendichas de las madres, las espozas, las ermanas, las mujeres de Israel ke lavoran komo ormigas fina el limito de la kanserya para ke  “Pesah no se fuyga” ansina diziya mi kerida mamita…. Pesah es la meza ke se apareja kon amor, kon gusto i kon flores, kon los mijores manteles, los platos i las kupas para fiestar el mirakulo de la salida de Egypto, de las tierras de afrisyon ande eramos esklavos del Pharaon i Di-o akodrandose de la Aliansa ke izo kon muestros patriarkos  Abraham, Itshak i Yaakov, salvandomos de Su Braso fuerte para salir a la Libertad !

Moshe yevando su puevlo afuera de Egypto por la Mar Korolada ke se partyo para ke Bnei Israel puedan pasar a las Tierras Apprometidas  kon todas sus bestias i sus bienes.

Pesah es regalos, flores, vistimienta mueva, la familya i todos los keridos aunidos para selebrar la fiesta kon alegriya, vino i kantes.   Bney Israel kada anyo sintiendo la mizma emosyon, i el mizmo entuzyazmo, savyendo ke son attados por la mizma fe i las mizmas tradisyones fina la fin de los tiempos i  AD HA NETSAH !

I….. EL ANYO KE VIENE EN YERUSHALAYIM !

HAG SAMEAH  i  MUADIM LE SIMHA

LEAVE A REPLY

Please enter your comment!
Please enter your name here