Era elevo,apenas tenia kinze anyos,
Su kara triste,su vistimienta de vyejos panyos,
Kaminava para vender kozas a kriaturas
Bonbones,djugetes,balas,lapes i minyaturas.
Desde su chikes ke kedo sin arimo,sin padre
Bivia una vida modesta djuntos su madre.
Un dia se sintyo kanso, sin fuersas fatigoso,
Estava komo hazino,abatido,sin gozo.
Kaminava debasho de akel sol muy kayente,
Las kayes eran asoladas,no se via djente.
Vido una mujer en su puerta trikotando
En ves en kuando a los pasharos migas echando.
Kon su timidez se aserko i kon su boz kalma
Tuvo el koraje i le disho lo de su alma.
<< Senyora,esto kansado,siento muncho la kalor
Puedo rogarle un vaso de agua por favor? >>
La mujer kompasiva kon su korason humano
Le ofresyo vaso de lechei torta kon su mano.
La rengrasyo de alma kon sus ojos lagrimozos
Estuvo muy tokado de sus biervos tan ermozos.
- Los anyos pasaron muy presto,la mujer humana
- Bivia sola,sin marido,sin una ermana.
- Estando en peligro de muerte,la transferaron
- A un hospital de otro territorio la yevaron.
- La sensya de la medesina s’apliko en eya
- En su kama siempre dormia en kolor de teya.
- Radiografias,tomografias,operasiones
- Dias i noches sin avrir los ojos kon passiones.
- Despues de semanas se salvo de sus agonias
- Retorno a la salud de antes i sus alegrias.
- Le trusheron la faktura antes de su salida
- Se sintyo un golpe enorme,su kara palida.
- La suma komo si fuera una fortuna era
- Kon boz tremblante konto su situasyon verdadera…
<< No se preokupe por el pagamiento Senyora
Deve kudyarse por estar saludosa…,porke yora?
El profesor “”Mayerson””mos desho una nota
Ke su pago fue echo kon vaso de leche i torta.>>