El Australiano “Michael Hopf” tenia un avuelo ke kolavoro kon Einstein komo un fizisisto Aleman.
Michael nos konta su relasión kon Einstein en las investigaciones molekulares para ver si avian errores de matematika. Michael nasido en Ingletierra lavora en la teknolojía de alimentasión i es padre de 3 kriaturas. Imigro a la Australia en 1980. Michael tiene unos livros eskritos por su avuelo i un portreto de el. Diez anyos antes izo una vijita a los Estados Unidos para presentar su istoria.
Ludwig Hopf nasio en Nuremberg en 1884 de una famiya Judía vendiendo yervas. Recivió su PHD en “Hidrodynamika” de la Universidad de Munich en 1909 i su professor era “Arnold Sommerfeld” ke lo introdusio a Einstein en una konferensia en Salzburgo. Einstein estava estudiando en la Universidad de Zurich i tenia menester de un asistente. Komo Ludwig avía estudiado la Psikoanalisis de Sigmund Freud i de Carl Jung, nasio una amistad ke duro por anyos.
Ludwig le demando a Jung ke pensava de Einstein? Era un ombre de talentos, djugando el violin i Ludwig djugava el piano. Los 2 se divertían a la fin de las investigasiones. Ludwig intervino kuando Einstein estava estudiando la relasión entre los números de atomes i sus pezgos. El maestro no estava kontente del resultado. Ludwig le ayudo i topo el error. Ansi el kolavoro kon Einstein en 2 papeles sovre la radiasión en 1910. En el anio sigiente Ludwig se fue kon Einstein a la Universidad Karl-Ferdinand en Prague. Se kedaron ayí por un tiempo. A su retorno se enkontró kon “Alice Goldschmidt” i se kaso kon eya. Tuvieron 6 kriaturas. 5 ijos i una ija. En la Primera Gerra Mundial Ludwig fue bazado en Berlin en el sektor de aviones militares. Despues de la Grande Gerra se izo professor de Hidrodinamika i Aerodinamika en la Universidad de Aachen. Kuando los Nazistos entraron en poder, su kariera yego al fin supito. Pedrió su pozisión por ser djudio en 1934. Einstein estava en America en 1933 i nunka se torno atrás. Ludwig se kedo en Alemania asta 1938 i se fue a Ingletierra. Tuvo un empiego en la Universidad de Cambridge i después se fue a Irlanda ensenyando Matematika. No se kedo mucho tiempo en Dublin al toparse muy hazino. Murio de la tiroid en 1939.
Un otro ijo de Ludwig “Peter” eskrivio ke su padre era una persona muy amable i ke tenia muchos amigos i ke no tenia un solo enemigo. “Erwin Schpoed” fizisiano austriako disho ke era el amigo grande del djenio.
En Melbourne 8 dékadas después “Michael Hopf” alava a su ijo Dr.Toby Hopf ke es un Fizisisto lavorando en Bélgica.
————–
Avlando de Einstein, el nasio en Ulm en 1879. En 1895 se fue a Suiza para ambezar i ensenyar. En 1905 resivio su PAD i publiko La Teoría de Relatividad. En 1921 resivio el Premio de Nobel. En 1933 se fue a Los Estados Unidos i se kedo ayí. En 1955 murió de un atako de korasón en New Jersey.
Trezladado por Simon Geron
Sydney
Fuente: Ladinokomunita