TEN TU NOMBRE LIMPYO
PARA KE TU SELEBRO KEDE ALEGRE
Sal Amira
Kon ke mi papu SALAMON ya estava en los Estado Unidos de Amerika i keriya trayer a su mujer i 3 kriyas, no lo puido azer porke a mi nona FLOR, madre de mi padre, le dyo una parada de korason! No pudo rekuperar de esto…(Le kedo el korason!)
charlestonLe afito esto baylando el bayle CHARLESTON kon muzika oyida de un GRAMEPFON i se fue al Ganedem porke teniya su nombre limpyo komo las aguas del Arktiko.
Mi onkli SEMOEL dize ke su madre se fue baylando. La famiya de mi padre siyenpre fueron optimistos uzando la dicha “ALLAHIN DEDIGI OLUR ” ( Todo se aze asigun la voluntad de Hashem ).
En esto todo mi nono SALAMON kumplyo kon su promesa i se yevo a la Amerika a su ija ALEGRE, ermana de mi padre.
Mi padre i mi onkli Somoel trataron de yir ande suz padres tambien. En el porto de PIREYO en GRESYA loz ofisyales egzaminavan loz dokumentos de los ke estavan listos para aresentarsen i bivir kon suz famiyaz en AMERIKA (USA).
Kuando mi padre yego enfrente de estos ofisiales lo egzaminaron i viyeron ke mi padre teniya dos dedos mankos en
la mano derecha de nasimiyento. I el inspector grego utilizado por el governo de AMERIKA desidyo ke mi padre era SAKAT – disabled. No pudiya yir a la AMERIKA. El onkli Somoel, el ermano de mi padre, se podia yir i entrar en el barko ama no kijo deshar a su ermano solo.
Kon este sentimiyento loz dos retornaroron a CHANAKKALE al kudyo de la nona MARI.