SOMOS JUDYOS…. MA KEN SOMOS ?
ERETS ISRAEL es muestro payis, lo sintimos en muestra alma, mos engrandesimos kon el amor por muestras tierras, rogamos por su bienestar, la paz, la reushitad ekonomika, la union de todos los judyos del mundo, el sukseso de muestro puevlo en todas las kompetensias, la buena edukasyon de los mansevos, la salud de las personas…. Ma en kualo kreyemos ? En ke mezura estamos attados a muestra relijyon ? Kualoe pensamos i kuanto partisipamos a la vida etika i a la obserevansya de las 613 ovligasyones de “azer” i “no azer” ke mos diktaron “Los savyos kon autoritad” del Judaizmo al kual apartenesemos ?
Personas se revoltaron pormodo de la difikultad de las observansyas en el mundo moderno, las restriksyones demasyado limitando las okupasyones del diya i de las libertades a laskualas todos aspiran, el odyo ke kavza las diferensyas entre las personas judiyas i todos los otros en sus payis, mozotros syendo “etranjeros” kon una lojika absolutamente diferente de las suyas i del sensyo komun…. Pormodo de estas razones prinsipalas alevantaron la kavesa ! Rechesaron las ovligasyones, todo lo ke los rabinos diktaron sin pensar dos vezes, egzersando sus autoritad i komo si keriyan vengarse de las personas en metyondo mas i mas restriksyones a lo ke ya estava duro de akseptar. Vemos rezultados katastrofikas a esta politika relijyoza, al Nombre del Divino, has ve halila, ke mos trusho la Inkizisyon, los progromes i la Shoa….. Porke de dinguna manera no iva aver todo esto si los Judyos se adaptavan al modo de vida de los payizes ande estavan “refujiyados, ajenos” i observavan sus relijyones komo todos los otros, sin sus vistidos, sus kipa, sus tsitsit, sus chapeyos, sus kreaturas i sus mujeres remarkadosmizmo de leshos ets. ets. Un poko de takto i silensyo, sin aminguar las personas pormodo de sus kreensyas i sus modo de vida iva aminguar tambien los rizikos de odyo en sus entorno. Ma no lo entyenden o no lo keren entender! I… arastan detras de eyos el puevlo entero judyo kon un selyo de odyo en sus frentes…. El antisemitizmo proviene del “bruido” de los judyos en la DIASPORA…. Si tanto keren observar el “bruido” asoplando el shofar en las kayes, ke vayan a Israel. Es sus payis ! Aya todo sera posivle i permetido ma komo no se puede dar dezrepoza kuando estamos en una kaza ke no es muestra, no deve de ser permetido de dezrepozar la gente de otros payizes ke avezes pormodo del “bruido” ke kavzan los judyos, se sienten etranjeros en sus payis komo fue el kavzo en Turkiya en los anyos 40-50 ! No vale gritar a los Sielos sin observar respekto al entorno. Ke me dizen aki ? Los judyos son los mas rikos ! (No mas oy !) estan en los mijores lugares, gozan del payis, estan en las kampanyas, se visten de la mijor manera, tienen todo i mos empleyan para ke lavoremos por eyos i se enrikeskan mas ! Oy munchas kozas trokaron por sierto ma las viejas fotografias sirkulan dayinda i las bokas no se serraron….Porke no keren serrarse tambien… Posivle !
Ke izyeron los ke se revoltaron ? Se izyeron reformistos ! Mujeres Rabanit ke ni se puediya pensar ansina de koza antes…..Shabat muncho mas fasil… No apartar mujeres de hombres… Bravoooo ! Amerikanizaron la relijyon i boltaron a ser Amerikanos. Los Gays son akseptados komo todos los otros, las orasyones pueden ser meldadas en diferentes linguas.
Egzisten los Orthodoxes i los Conservativos los Hassidic, los Reformistos i los Rekonstruksyonistos i otros… Se dize ke los 12% de los Judios son Orthodoxes, 29 % son konservatistos, 42 % son reformistos i 18 % son de otros movimientos. Ay munchos ateistos i agnostikos tambien !
Los konservativos son Judyos ke no son tan fanatikos i no se apegan a la Ley los ojos serrados, rechesando todo lo ke es diferente de lo ke los rabis les dizen ! Son los Orthodoxes, los Hassidim i otros movimientos komo los Naturei Karta ke biven… No, no biven del todo !
Los konservativos son modernos ma no tanto komo los reformistos. Observan las tradisyones ma son avyertos tambien al mundo. Akseptan la Tora i el Talmud tambien. Shabat, el estudyo del Hebreo, el Kasherut i el Zionismo tienen muncha importansya. No son de los barvudos pretos. Se visten la kipa.
El Reformizmo empeso en los anyos 1800 en Alemanya. Es muncho mas liberal. La Birka Mila no es un dover. El Shabat es muncho mas fasil de observar. No se kreyen en el Talmud. Las mujeres pueden ser rabanites i los Gays son akseptados al kontraryo de los otros movimientos. Se fundyo de la parte de Rabbi Abraham Geiger para aderar mijor a la vida sosyal aktual. Se pueden kazar tambien kon personas de otra relijyon.
Es Baal Shem Tov ke fundyo el Hassidizmo en los 1700. Son orthodoxes ma diferentes. Ay munchos sektos relijyozos entre los orthodoxes. Teniyan mas valor los edukados. En los Hassidim todos son iguales i son ferventes en sus orasyones kon los kantos i los bayles . Tienen kontakto direkto kon sus Rebbe, el lider del sekto. Son inkluidos en este sekto los Satmar, Chabad, Gur, Breslov, Toldos Aharon i Belz.
Tu letra me izo un plazer enorme Rivkale. Estava, para mi, yenna de buendad, de responsabilidad, de amor para los paryentes i las kreaturas, de lo djusto de esta vida, del dover, de las ovligasyones ke komporta la medisina ke no acheta de dinguna manera ni Shabat, ni hag, ni diya, ni noche, ni repozo, ni komida, ni teyatro ni boda o luna de miel a vezes…. I yo personalamente no kreyo ke es un pekado sin remedyo ke el Todo Poderozo va kastigar de manera la mas dura posivle. Komo lo dishites tan bueno, penso ke seriya muy triste mi Di-o tan Kerensyozo si deshamos las personas sufrir o deziluzyonamoz muestros paryentes ke mos keren ver, bezar i ser kon mozotros un kurto tiempo o no mos okupamos i edukamos muestros chikos, porke yo penso ke la edukasyon es en kaza i nunka kale deshada a la eskola.
Por sierto, el ke no tiyene doveres tan striktos i eskoje la vida de alta etika en indo asigun la tora-mitsvot, todo tiene un otro aspekto, doveres spirituales ke le inchen la vida kon valores idealas. Es el idealizmo perfekto i difisil a obtener por una persona ke no se engrandesyo kon estos prensipyos, esta disiplina kontrolada striktamente durante la vida de kada diya i ke se puede ekstendir de manera a estrechar la libertad de la persona al maksimum si es inyorente, no aze lavorar su entendimyento i su lojika, mizmo si todo esta diktado i eksplikado kon munchos detalyos en los Livros de la Ley i las Eskrituras de muestros hahamim en Ganeden. Lo ke me espanto de demandar, porke konosko la repuesta, es si no ay un kamino “shvil ha zaav” entre esta alta etika i una persona “buena ke kreye, tiyene emuna, adora su Di-o, el Kreador i Todo Poderozo, tyene una vida sana i derecha, no aze dingun mal, observa los 10 Komandimyentos (Komo goyes !)
Me vana dizir NO Rivakale….Porke esto todos tyenen ke azerlo, Personas del todo el mundo I ay munchos munchos ke responden a estos kriteres. Ser djudyo, me esto ambezando, es ser uno de Su puevlo eskojido ! I esto, esta demandando una otra manera de esfuerso ! Esta vida etika ke mos viene tan difisil no se deke…. A mi me espanta ! No kero pekar… Voluntaramente ! De otra vanda so djudiya i a mi puevlo le kayo de bivir ansina por ke es El ke mo los amostro, mos dyo las restriksyones i mos enalteso kon estas etikas a un lugar diferente a Sus ojos… Mos alimpyo del resto de los humanos, mos dyo un privilejyo ke pagamos karo kon doveres a observar siempre, una vida entera para ken empesa des de ke es un bebe… Una vida sosyal intensivamente kon la kehila endjuntos, muncha famiya, kreaturas, tradisyones de fiestas, tradisyones de bodas de luto, el erev shabat i el shabat, epokas en el anyo komo en Pesah en yamim noraim i Hagim ke nesesitan alta enerjiya, salud, buena humor, tiempo, pasensya i fuersa…. El djudyo no puede tener el lukso de bivir retirado del mundo mizmo si esto es su plazer ! Es un echo el ser djudyo…I komporta todo el saver etiko, sosyal, kulinaryo, psikolojiko i mas i mas…. No puedes kerer espandirte i durmir ! Ayde….. Ayde…. Kale…… Ser djudyo no es para los haraganos ! Los mizantropos ! Los a-sosyales, los hazinos psikolojikos, o los hazinos, los ke no pueden kansarsen i no les plaze kaminar, fiestar…. Es un trokamiyento drastiko no de kreensya, porke 99,99 % no tyenen problemas kon esto ma kon el resto ! Iiiiiii el problem no es el hombre ke lo tiyene ! El se viste i se va al kal, aze sus dinim sus orasyones…..fasil ! La mujer ? Oy ve ! Lo ke la aspera en su vida ! Lavorar, bebikos de engrandeser i…. i…. O te vaza konsentrar solo en tu vida de altos prensipyos. Vale ! La limpyeza, el orden en la kaza, el kudyado de si-mizmo, el tyempo ke kale konsakrar a engrandeser las kreaturas (i yo no avlo de darles a komer i banyarlos i vistirlos solo !) la kozina, el lavado el fregado el uti, la vida sosyal, el merkado, el marido (kale dar le tyempo i a el i no estando kansada i enfasyada !!!) la famiya a vijitar a kudyar.. 2 famiyas ! i Meldar ? eskrivir ? brodar, hobbies, un filmo o una piyesa de teatro, un opera ? Andar a kaminar i azer sport ? Kale diyas de 40 horas !!!! Ansiiiiii, sin las ovligasyones etikas no abasta el tyempo a ken kere abastar a todo, Alora komo lo azen ? !!! Ademas yo !!! Si veygo un polviko o una koza no a su lugar i no todo komo se deve, empeso a baylar ! Ayyyyy No se ! El Di-o da la pasensya i el tyempo para todo. Ke lokura de kazarse i tener kreaturas ! Ay tantas kozas interesantes de azer ! Va ugrasheya kon “ande te fuites, deke izites, porke gastates, deke no yamates, porke durmites i mili un porke i deke ke te kome la alma i el meoyo ! Si no ay deke i porke es ke el no esta ! Deke no esta ? Lo del penseryo de “ande esta ?” es otra merikiya ! Aravyarse i pletos i inyervos otra koza !!!! No se yo ! Parese ke me ize muy vieja i todo me esta vinyendo mas difisil ke es en verdad…. Deve ser ansina sino komo todos biven ? El Di-o ke les de todo bueno !
Grasyassssssssss mil a mi Kreador ke me izo la mujer la mas horoza, la mujer ke tyene todo lo ke dezeya, kontente de todos i de todo a su deredor kon alegriya i amor en su korason, un meoyiko ke lavora bastante bien i muy kerida de su ijiko i de todos los ijikos ke engrandesyo, todos unos i unos lo mijor ke puede ser ! Allelluya !
La salud se va ir i tyempos duros vana vinir, kon bueno ke seya, esto asperando mi torno…Va ser no muy tadre i me vo ir de este mundo ringrasyando mi Di-o para todo lo ke me dyo, me izo VER, SINTIR, OYIR, KAMINAR, VIJITAR, AZER, REUSHIR, GOSTAR, PENSAR, ESKRIVIR i lo mas el AMOR i la BUENDAD i la RIZA , el KEYF, la INTELIJENSYA i el OPTIMIZMO ke metyo en mi, me regalo para ke goze i de a gozar a munchos.
Shavua tov, bendisyones i salud para vozotros todos.
sharope.blanco@gmail.com