i puediyamos reduisir la poblasyon de la Tierra a un chiko puevlo de solo  100  habitantes en guadrando las proporsyones ke egzisten agora avriya :

  • 57 Asiatikos  –  21  Europeos  –  8  Afrikanos i 4  Amerikanos .
  • 52 mujeres  por   48  hombres
  • 70 de kolor  por   30  blankos
  • 30 kristyanos por 70  de otras relijyones
  • 89 heteroseksuales  i  11  homoseksuales
  • 6 personas deteneriyan el 59 %   de toda la rikeza.
  • De estos, solo  2  deyos  seriyan Norte Amerikanos.
  • 50 personas sovre  100   biviriyan en la povretad.
  • 5  no savriyan meldar i eskrivir
  • 50 sufreriyan de malnutrisyon
  • 1 persona estariya al punto de murir
  • 1 bebe al punto de naser
  • En este puevlo  1   solo seriya universitaryo
  • I  1 solo tendriya una komputadora

Si te alevantates esta demanyana kon salud sos mas mazalozo de milliones de personas ke no alkansaron a sobrebivir esta semana…

Si nunka eksperimentates los sufrimyentos de las guerras, la soledad de estar aprezado, la agoniya de la tortura, la afliksyon de la ambre, alora estas en mijor pozisyon de 500 Milyones de personas…

Si tienes komida en tu refrijerator, vistidos en tu almaryo, un techo i durmes en tu kama repozada, sos mas riko del   75  %  de la poblasyon mundyal.

Si tienes paras en la banka o guadradas en kaza en una kasha, ya te topas entre los  8  %  de los mas rikos del mundo.

Si tienes madre i padre ke estan bivos i unidos, sos una persona muy rara…

Espero de vedra ke mos sintimos muncho mijor i muy afortunados de vedra.  Grasyas siempre al Di-o  por yegar a este diya kon bastante salud mizmo si mos duele aki i aya komo todos a una sierta edad…  No es nada komparado a el estado de innombravles hazinos en sus kazas o en los hospitales sin mizmo saver, en vezes, si se van a sanar o no…

Lo ke me da a pensar este eskrito es ke kon tanta i tanta gente inyorante o bivyendo en malas kondisyones, a vezes inhumanas, kuanta pasensya devemos tener ?  Es muy difisil de ser konsiente, de ver i de bivir kon tanta mizerya en los entornos o mizmo leshos de mozotros.

Komer todo lo ke keremos, englenarmos, durmir repozados savyendo lo ke sufren los otros, muestros ermanos humanos.  Chikos muryendosen de ambre, mizmo las bestias tremblando en invyerno o no topanda ni agua para bever en las kalores del enverano, sin nada para komer, la agoniya de la muerte diya atras diya… Komo no dezeyar de bivir en un mundo mijor ande renya la paz i el bienestar para todos, hombres i bestyas…. Un mundo sin sufriensyas, sin ambre i ser, sin dezgrasyas naturales ke trayen la dezolasyon total de los lugares aharvados…  Deshan gente yorando por sus keridos, sin kazas, sin nada para sobrebivir a vezes… ApiyadaTE del Mundo Di-o miyo…

Damos la fuersa, el saver, la rezolusyon de todos los puevlos para fraguar un mundo de PAZ i de BUENDAD.
Amen.